சிறகவரை எண்ணெய்க் கறி

அவரை வகைகளில் தாவரப் புரதம் தரும் காய்கறிகளில் சிறகவரை சிறப்பானதொன்று . மினசோட்டா மாநிலத்தில் சீனக் கடைகளிலும், ரொரோன்ரோவில் தமிழ், சீன, தாய்லாந்துச் சந்தைகளிலும் கிடைக்கும்.

தேவையானவை

1/2 இறாத்தல் பிஞ்சு சிறகவரை

5 நறுக்கிய சின்ன வெங்காயம்

2 நறுக்கிய பச்சை மிளகாய்

1 சிறுகிளை கறிவேப்பிலை

4 நறுக்கிய உள்ளிப்பூண்டு நகம்

1 அங்குல இஞ்சி (தட்டி எடுத்தது )

10-15 கடுகு

½ தேயிலை கரண்டி வெந்தயம்

1 தேயிலை கரண்டி சீரகம்

1 கோளை உருண்டை பழப்புளி

1 தேயிலை கரண்டி சீனி அல்லது சர்க்கரை

1/2 மேசைக்கரண்டி மஞ்சள் தூள்

1 மேசைக் கரண்டி கறி மிளகாய்த்தூள்

1 கோப்பை தேங்காய்பால்

1 மேசைக்கரண்டி சமையல் எண்ணெய்

உப்பு தேவையான அளவு

தயாரிப்பு முறை

சிறகவரையை கழுவி சிறிய துண்டுகளாக அரிந்து எடுத்துக்கொள்ளவும். நீரில் இருந்து அகற்றி, சற்று பிழிந்து நீரை அகற்றி மஞ்சள் மற்றும் உப்பு சேர்த்துப் பிரட்டவும்.

சூடான கொதி எண்ணெய்த் தாழியில் உடன் போட்டு 1-2 நிமிடங்கள் தாளித்து, பக்கத்தில் வைத்துக்கொள்ளவும். இளம் பச்சை நிறம் முற்றிலும் மஞ்சளாக வரும் வரை விடாது கிளறிக் கொள்ளவும்.

பழப்புளியைச் சற்று சூடான அரை கோப்பை நீரில் குழைத்து, புளிச்சாறை வடித்துக்கொள்ளவும்.

ஒரு தட்டையான சட்டியில் மிதமான சூட்டில் , வெங்காயம் மிளகாய்த்துண்டுகளைச் சிறிதளவு எண்ணெயில் பொரித்து உடன் வெந்தயம்,கடுகு,சீரகம், கறிவேப்பிலை போன்றவற்றைச் சேர்த்து 1-2 நிமிடம் வறுக்கவும். பின்னர் சமையல் எண்ணெய் உடன் சேர்த்துக்கிளறவும்.

அடுத்து வடித்து எடுத்த புளியம் ரசம், கறித்தூள் (யாழ்ப்பாணத்தார் மிளகாய்க் கறித்தூள்) உப்பு சேர்த்துக்கொள்ளவும். பின்னர் 2-3 நிமிடங்களுக்குப் பொரித்த அவரைக்காய்களையும் சேர்த்துக் கொதிக்க விடவும். அடுத்து தேங்காய்ப்பால், மற்றும் சீனி அல்லது சர்க்கரை சேர்த்து மூடி மேலும் 5 நிமிடங்கள் அடுப்பில் மிதமானச் சூட்டில் கொதிக்கவிடவும்.

சிறகவரை எண்ணெய்க் கறியைச் சோற்றுடன் பரிமாறலாம்.

– யோகி