10 நிமிட பறவை கீதம்: மன அழுத்தத்தைப் போக்கும் இயற்கை மருத்துவம்!
10 நிமிட பறவை கீதம்: மன அழுத்தத்தைப் போக்கும் இயற்கை மருத்துவம்!
மரங்கள் அடர்ந்த பசுமையான சூழலிலும், பறவைகளின் இனிய கீதங்களுக்கு மத்தியிலும் வெறும் 10 நிமிடங்கள் நேரத்தைச் செலவிடுவது மனிதர்களின் மனநிலையைக் கணிசமாக மேம்படுத்தும் என்று புதிய ஆய்வு ஒன்று தெரிவிக்கிறது.
வட கரோலினா மாநிலப் பல்கலைக்கழகத்தைச் சேர்ந்த டாக்டர் நில்ஸ் பீட்டர்சன் மற்றும் லிங்கன் ஆர். லார்சன் தலைமையிலான சர்வதேச ஆராய்ச்சிக் குழு இதுகுறித்த ஆய்வை மேற்கொண்டது. இவ்வாய்வின் முடிவுகள் கேம்பிரிட்ஜ் பல்கலைக்கழக அச்சகத்தின் ‘சுற்றுச்சூழல் பாதுகாப்பு’ (Environmental Conservation) என்ற இதழில் வெளியிடப்பட்டுள்ளன.
ஆய்வின் சுவாரசியமான கண்டுபிடிப்புகள்
ஆராய்ச்சியாளர்கள் 106 பங்கேற்பாளர்களைக் கொண்டு, நிலப்பரப்பு மற்றும் ஒலியின் நான்கு வெவ்வேறு கலவைகளைச் சோதித்தனர். மீட்டெடுக்கப்பட்ட ஆற்றங்கரைக் காடு மற்றும் மக்கள் நெருக்கம் மிகுந்த நகர்ப்புறப் பகுதி ஆகிய இரண்டிலும், பங்கேற்பாளர்கள் ஹெட்ஃபோன்கள் வழியாகப் பறவைகளின் கீச்சொலியையோ அல்லது போக்குவரத்து இரைச்சலையோ கேட்டவாறு அமரவைக்கப்பட்டனர்.
- மிகச் சிறந்த கலவை: மீட்டெடுக்கப்பட்ட காடு மற்றும் பறவைகளின் கீதம் இணைந்து கிடைத்த சூழல், பங்கேற்பாளர்களின் மன அழுத்தத்தைக் பெருமளவில் குறைத்து, நேர்மறை உணர்வுகளை அதிகரித்தது.
- மோசமான சூழல்: நகர்ப்புறச் சூழலில் அமர்ந்து போக்குவரத்து இரைச்சலைக் கேட்பது பங்கேற்பாளர்களின் மனநிலையை மேலும் மோசமாக்கியது.
- ஒருங்கிணைந்த பயன்: காடு மட்டுமேகூட மன அழுத்தத்தைக் குறைக்கிறது. ஆனால், அதனுடன் பறவைகளின் ஒலியும் சேரும்போது மனதிற்குள் புத்துணர்ச்சியும் மகிழ்ச்சியும் இரட்டிப்பாகின்றன.
செயற்கையாக உருவாக்கப்பட்ட காடுகளும் பயன் தருமா?
இந்த ஆய்வில் பயன்படுத்தப்பட்ட காடு பல நூற்றாண்டுகளாக இருக்கும் தொன்மையான வனப்பகுதி அல்ல. மாறாக, 2002 மற்றும் 2006-க்கு இடைப்பட்ட காலத்தில் சூழலியல் மறுசீரமைப்பு மூலம் உருவாக்கப்பட்ட ஒரு மீட்டெடுக்கப்பட்ட காடு (Restored Forest) ஆகும். மனிதர்களால் புனரமைக்கப்பட்ட பசுமைப் பகுதிகளும், பாரம்பரியக் காடுகளுக்கு இணையான உளவியல் நன்மைகளை வழங்க முடியும் என்பதை இது நிரூபிக்கிறது.
நகரத் திட்டமிடுபவர்களுக்கு ஓர் விழிப்புணர்வு
நகரங்கள் வேகமாக விரிவடைந்து வரும் இன்றைய சூழலில், மக்கள் இயற்கையோடு செலவிடும் நேரம் குறைந்து வருகிறது.
- பரந்த பூங்காக்களை அமைப்பது மட்டுமன்றி, பறவைகள் வாழக்கூடிய சிறிய அளவிலான புனரமைக்கப்பட்ட பசுமைப் பகுதிகளை உருவாக்குவதும் மக்களின் பொதுச் சுகாதாரத்திற்கு பெரும் நன்மை அளிக்கும்.
- எந்தவொரு சிறப்பு உபகரணங்களோ அல்லது நீண்ட நேரப் பயிற்சியோ இன்றி, இயற்கையான ஒலியைக் கேட்பது மட்டுமே மனச் சோர்விலிருந்து விடுபட உதவுகிறது.
சூழலியல் மீட்டெடுப்பையும் இயற்கை ஒலிகளையும் இணைத்து நகரங்களை வடிவமைப்பது, பல்லுயிர் பெருக்கத்திற்கு உதவுவதோடு மட்டுமல்லாமல், மனிதர்களின் மன நலனைப் பாதுகாக்கும் ஒரு சிறந்த முதலீடாகவும் அமையும்.
– யோகி
