பாரதிராஜாவின் அழியாப் பயணம்

தமிழ் சினிமாவை ஸ்டூடியோக்களின் நான்கு சுவர்களுக்குள்ளிருந்து, வண்ணமயமான கிராமத்து மண்வாசனைக்கும், யதார்த்தத்திற்கும் கூட்டிச் சென்றவர் ‘இயக்குனர் இமயம்’ பாரதிராஜா. 1977-இல் தொடங்கி ஐந்து தசாப்தங்களுக்கும் மேலாகத் தமிழ் திரையுலகின் திசையை மாற்றியமைத்த இந்த மகா கலைஞனின் மறைவு, தமிழ் கலை உலகிற்கு ஈடுசெய்ய முடியாத பேரிழப்பாகும்.

தேனி மாவட்டம் அல்லிநகரத்தில் 1941 ஜூலை 17 அன்று சின்னச்சாமி பெரியமாயத் தேவர் – கருத்தம்மாள் தம்பதியினருக்கு மகனாகப் பிறந்தார். இவரது இயற்பெயர் சின்னச்சாமி. எளிய விவசாயக் குடும்பப் பின்னணியைக் கொண்ட இவர், சிறுவயதிலேயே கிராமத்துத் திருவிழாக்கள், நாடகங்கள் ஆகியவற்றின் மீது தீராக்காதல் கொண்டிருந்தார். கிராமத்து மனிதர்களின் எளிய இயல்புகளையும், மண்ணின் அரசியலையும் மிக நெருக்கத்திலிருந்து கவனித்து வளர்ந்ததே பின்னாளில் அவரது படங்களின் ஆகச்சிறந்த மூலதனமானது. தன் தாயார் மீதிருந்த பாசத்தின் வெளிப்பாடாகவே பின்னாளில் தான் இயக்கிய ஒரு சமூகப் புரட்சித் திரைப்படத்திற்கு ‘கருத்தம்மா’ என்று பெயர் சூட்டினார்.

சினிமா ஆசையில் சென்னைக்கு வந்த பாரதிராஜாவுக்கு ஆரம்பக் காலம் எளிதாக இருக்கவில்லை. நாடகங்களில் நடித்தும், பல இயக்குனர்களிடம் உதவியாளராகச் சேர முயன்றும் பல போராட்டங்களைச் சந்தித்தார். இயக்குனர் பி. புத்திரன் மற்றும் பிரபல கன்னட இயக்குனர் புட்டண்ணா கனகல் ஆகியோரிடம் உதவி இயக்குனராகப் பணியாற்றி, சினிமா கலையின் நுணுக்கங்களைக் கற்றுக்கொண்டார். 1977-ஆம் ஆண்டு, பாரதிராஜாவின் திரைப்பயணத்தில் மட்டுமல்ல, தமிழ் சினிமாவின் வரலாற்றிலேயே ஒரு திருப்புமுனை ஆண்டாக அமைந்தது. அவரது இயக்கத்தில் வெளியான ’16 வயதினிலே’ திரைப்படம், அதுவரை இருந்த நாடகத்தன்மையான தமிழ் சினிமாவை புதிய திசைக்குத் திருப்பியது.

இத்திரைப்படம் தமிழ் சினிமாவின் இருபெரும் சூப்பர் ஸ்டார்களின் ஆரம்பகால திரை ஆளுமையைச் செதுக்கியதில் மிக முக்கிய மைல் கல்லாகும். அதுவரை நகர்ப்புறக் கதைகளிலும் ஸ்டூடியோ செட்களிலும் நடித்துக் கொண்டிருந்த கமல்ஹாசன் மற்றும் ரஜினிகாந்த் ஆகிய இருவரையும் முற்றிலும் மாறுபட்ட கிராமத்து மனிதர்களாக உலகிற்கு காட்டினார் பாரதிராஜா. கமலின் கள்ளம்கபடமில்லாத, அப்பாவித்தனமான ‘சப்பாணி’ கதாபாத்திரமும், ரஜினிகாந்தின் மிரட்டலான வில்லத்தனம் கலந்த ‘பரட்டை’ கதாபாத்திரமும் (அவரது புகழ்பெற்ற “இது எப்படி இருக்கு?” வசனத்துடன்) தமிழ் திரையுலகின் வரலாற்றுப் பக்கங்களில் அழியா இடம் பெற்றன. பாரதிராஜாவின் இந்த எளிய, குறைந்த பட்ஜெட் கிராமத்துக் கதைக்காக கமல் மற்றும் ரஜினி இருவருமே தங்களின் சம்பளத்தைக் கணிசமாகக் குறைத்துக் கொண்டு நடித்தனர் என்பது குறிப்பிடத்தக்கது.

கமலுடனான பாரதிராஜாவின் கூட்டணி ’16 வயதினிலே’ படத்துடன் நின்றுவிடவில்லை. பாரதிராஜாவை ஒரு கிராமத்து இயக்குனர் என்று மட்டுமே முத்திரை குத்தியவர்களுக்குப் பதிலடி கொடுக்கும் வகையில், கமல்ஹாசனை வைத்து ‘சிகப்பு ரோஜாக்கள்’ (1978) என்ற த்ரில்லர் திரைப்படத்தை நகர்ப்புறப் பின்னணியில் இயக்கிப் புரட்சி செய்தார். இதில் கமலின் சைக்கோ கொலையாளி நடிப்பு பலரையும் திடுக்கிடச் செய்தது. தொடர்ந்து இவர்கள் கூட்டணியில் உருவான ‘டிக் டிக் டிக்’ மற்றும் ‘ஒரு கைதியின் டைரி’ போன்ற திரைப்படங்கள் கமலின் நடிப்புப் பசிக்குத் தீனி போட்டதோடு, தமிழ் சினிமாவின் ஸ்டைலையும் மாற்றின. ரஜினிகாந்தை வைத்துப் பின்னாளில் ‘கொடி பறக்குது’ (1988) என்ற அதிரடி போலீஸ் திரைப்படத்தையும் பாரதிராஜா இயக்கினார்.

பாரதிராஜாவின் வருகைக்கு முன்புவரை, கிராமத்து கதைகள் என்றாலும் கூட அவை சென்னை ஸ்டூடியோக்களில் செட் போட்டுத்தான் எடுக்கப்பட்டன. முதன்முதலில் கேமராவைத் தூக்கிக்கொண்டு அசல் கிராமத்துத் தெருக்களுக்கும், வயல்வெளிகளுக்கும் சென்றவர் பாரதிராஜா. கதாபாத்திரங்களுக்கு மேக்கப் போடுவதைக் குறைத்து, நிஜ மனிதர்களைப் போன்ற தோற்றத்தை உருவாக்கினார். வெறும் பொழுதுபோக்குக் படங்களாகத் தராமல், சமூக அவலங்களையும் ஓங்கி உரைத்தார்.

குறிப்பாக, ‘கருத்தம்மா’ படம் மூலம் பெண் சிசுக்கொலை என்னும் சமூகக் கொடூரத்தை உலகிற்குத் தோலுரித்துக் காட்டினார். இத்திரைப்படம் வெளியாகி சமூகத்தில் பெரும் விவாதங்களை எழுப்பிய அதே 1994-ஆம் காலகட்டத்தில் தான், இந்திய அரசும் பெண் சிசுக்கொலையைத் தடுக்கவும், பிறப்புக்கு முன் பாலினம் கண்டறிவதைத் தடை செய்யவும் ‘PCPNDT சட்டம்’ (Pre-Conception and Pre-Natal Diagnostic Techniques Act, 1994) என்ற வரலாற்றுச் சிறப்புமிக்க சட்டத்தைக் கொண்டு வந்தது. சட்டம் ஒருபுறம் இருந்தாலும், சாமானிய மக்களிடம் பெண் குழந்தைகளைக் காக்க வேண்டும் என்ற விழிப்புணர்வு விதையை ஆழமாக விதைத்ததில் பாரதிராஜாவின் இந்தத் திரைப்படத்திற்கு மிக முக்கியப் பங்குண்டு. இதேபோல ‘வேதம் புதிது’ மூலம் சாதியக் கொடுமைகளுக்கு எதிராகவும், ‘அலைகள் ஓய்வதில்லை’ மூலம் மதங்களைக் கடந்த காதலையும் பேசி சமூகத்தில் பெரும் தாக்கத்தை ஏற்படுத்தினார்.

திரைப்படங்களைத் தாண்டி, பாரதிராஜாவின் ஆளுமை தீவிரமான தமிழ் தேசிய மற்றும் அரசியல் ஈடுபாட்டிலும் வெளிப்பட்டது. “என் இனிய தமிழ் மக்களே…” என்ற அவரது புகழ்பெற்ற கணீர் குரல் வாழ்த்து வெறும் சினிமாவுக்கானது மட்டுமல்ல, அது அவரது தமிழ் உணர்வின் அடையாளம். காவிரி நதிநீர் விவகாரத்தில் தமிழக விவசாயிகளின் உரிமைகளுக்காகப் போராட ஒட்டுமொத்தத் திரையுலகையும் நெய்வேலிக்குத் திரட்டி முன்னணி நின்று வழிநடத்தினார். ஈழத்தமிழர் துயரங்களுக்காகவும், ஈழ விடுதலைப் போராட்டக் களத்திலும் தொடர்ந்து தனது வலுவான தார்மீக ஆதரவுக் குரலைத் துணிச்சலாகப் பதிவு செய்து வந்தார். மேடைக்கு மேடை மக்கள் நலம் சார்ந்தும், தமிழ் மண்ணின் கலை-கலாச்சார உரிமைகள் சார்ந்தும் அவர் பேசிய தீவிர அரசியல் நிலைப்பாடுகள், அவரை வெறும் சினிமா கலைஞனாக மட்டும் சுருக்கிவிடாமல், ஒரு சமூகப் போராளியாகவும் மக்கள் மத்தியில் உயர்த்திக் காட்டின.

தன் வாழ்நாளின் இறுதிக்காலத்திலும் புதிய தலைமுறைத் தொழில்நுட்பத்திற்கும், ஓடிடி (OTT) உலகிற்கும் ஏற்பத் தன்னை தகவமைத்துக் கொண்டார் பாரதிராஜா. அமேசான் பிரைம் வீடியோவில் வெளியான ‘மாடர்ன் லவ் – சென்னை’ (Modern Love = Chennai – 2023) என்ற புகழ்பெற்ற ஆந்தாலஜி வெப் சீரிஸில், ‘பறவைக் கூட்டில் வாழும் மான்கள்’ என்ற எபிசோடை இயக்கியிருந்தார். கிஷோர், ரம்யா நம்பீசன், விஜயலட்சுமி ஆகியோர் நடித்த இக்கதை, விவாகரத்து மற்றும் மறுமணம் சார்ந்த ஒரு முதிர்ச்சியான, நாகரீகமான நகர்ப்புறக் காதலைப் பேசியது. எண்பது வயதைக் கடந்த ஒரு மூத்த இயக்குனர், தற்கால சென்னை மனிதர்களின் மன ஓட்டத்தையும், நவீன உறவுச் சிக்கல்களையும் இவ்வளவு மென்மையாகவும் யதார்த்தமாகவும் உலகத் தரத்தில் காட்சிப்படுத்தியிருந்தது ஒட்டுமொத்தத் திரையுலகையும் வியப்பில் ஆழ்த்தியது. இதற்கு அவரது ஆஸ்தான கூட்டாளியான இசைஞானி இளையராஜா இசையமைத்திருந்தார்.

தமிழ் சினிமாவிற்குப் பாரதிராஜா செய்த ஆகச்சிறந்த கைமாறு, அவர் அறிமுகப்படுத்திய கலைஞர்கள் தான். நடிகர்களைத் தாண்டி, அவரிடம் உதவி இயக்குனர்களாகப் பணிபுரிந்து பின்னாளில் தமிழ் சினிமாவின் முன்னணி இயக்குனர்களாக உருவெடுத்தவர்களின் பட்டியல் மிக நீளமானது. பாரதிராஜாவின் பாசறையிலிருந்து வந்த கே. பாக்கியராஜ் (சுவரில்லாத சித்திரங்கள்), மணிவண்ணன் (கோபுரங்கள் சாய்வதில்லை), ஆர். சுந்தர்ராஜன் (பயணங்கள் முடிவதில்லை), மனோபாலா (பிள்ளை நிலா), மற்றும் சித்ரா லட்சுமணன், பி.சி. அன்பழகன் போன்ற பல ஆளுமைகள் தமிழ் சினிமாவின் வணிக மற்றும் யதார்த்த எல்லைகளை விரிவுபடுத்தியவர்கள். இவர்களோடு கார்த்திக், ராதாரவி, சுதாகர், நெப்போலியன் போன்ற கதாநாயகர்களையும், ஸ்ரீதேவி (நாயகியாக), ராதிகா, ரேவதி, ராதா, காஜல், ரஞ்சனி போன்ற சிறந்த கதாநாயகிகளையும் அவர் செதுக்கினார். இசைஞானி இளையராஜாவுடன் இணைந்த அவரது அசுர கூட்டணி தமிழ் சினிமாவின் இசை வடிவத்தையே மாற்றியது. பாரதிராஜா இயக்கிய ‘கிழக்குச் சீமையிலே’ மற்றும் ‘கருத்தம்மா’ போன்ற படங்களின் மூலம் ஏ.ஆர். ரஹ்மானின் கிராமிய இசைப் பயணத்திலும் அவர் முக்கியப் பங்காற்றினார். பின்னாட்களில் ஆயுத எழுத்து, பாண்டிய நாடு, குரங்கு பொம்மை, திருச்சிற்றம்பலம், மகாராஜா போன்ற படங்களில் ஒரு சிறந்த நடிகராகவும் தன் முத்திரையைப் பதித்தார்.

இவரது தனிப்பட்ட வாழ்வைப் பார்த்தோமானால், 1974-இல் சந்திரலீலா என்பவரைத் திருமணம் செய்துகொண்ட பாரதிராஜாவுக்கு, மனோஜ் குமார் என்ற மகனும், ஜனனி என்ற மகளும் பிறந்தனர். தந்தையைப் போலவே சினிமாவைக் காதலித்த மனோஜ், மணிரத்னம் மற்றும் ஷங்கர் போன்ற ஆளுமைகளிடம் உதவி இயக்குனராகப் பணிபுரிந்தார். தொடர்ந்து, 1999-இல் பாரதிராஜா இயக்கிய ‘தாஜ்மஹால்’ திரைப்படத்தின் மூலம் மனோஜ் கதாநாயகனாக அறிமுகமானார். அதற்குப் பிறகு சமுத்திரம், கடல் பூக்கள், ஈர நிலம், மாநாடு, விருமன் எனப் பல படங்களில் நடித்துத் தனக்கென ஒரு இடத்தைப் பிடித்தார்.

பாரதிராஜாவின் தனித்துவமே அவரது மாறாத எனர்ஜியும் இளமையும் தான். எண்பது வயதைக் கடந்த நிலையிலும், சில வருடங்கள் முன்புவரை கூட ஜீன்ஸ் மற்றும் டி-சர்ட் அணிந்து, சமகால இளைஞர்களுக்கு சவால் விடும் வகையில் சுறுசுறுப்புடனும் இளமையுடனும் वலம் வந்தார். அவரது உடலமைப்பும் கம்பீரமும் திரையுலகினரையே வியக்க வைத்தது. ஆனால், கடந்த சில ஆண்டுகளாகவே அவரது வயோதிகமும், உடல்நலக் குறைவும் அவரது தோற்றத்தில் வெளிப்படத் தொடங்கின.

இதற்கிடையில், விதியின் கொடூரக் கரங்கள் பாரதிராஜாவின் வாழ்வில் பெரும் சோகத்தை நிகழ்த்தின. இதய அறுவைச் சிகிச்சை செய்துகொண்டு வீட்டில் ஓய்வெடுத்து வந்த மனோஜ், 2025 மார்ச் 25 அன்று தனது 48-வது வயதில் திடீர் மாரடைப்பால் காலமானார். எந்தவொரு தந்தைக்கும் மகனின் இழப்பை விடப் பெரிய துயரம் இருக்க முடியாது. தன் கண் முன்னே வளர்த்து ஆளாக்கிய மகன், தனக்கு முன்னால் செல்வதை தாங்கிக்கொள்ளும் சக்தி அந்த முதிய கலைஞனுக்கு இருக்கவில்லை.

மனோஜின் மறைவு பாரதிராஜாவை முற்றிலுமாக உடைத்துப் போட்டது. மகனின் மரணத்திற்குப் பிறகு அவர் பழையபடி இல்லை, முற்றிலும் தனித்து விடப்பட்ட உணர்வில் தீவிர மன உளைச்சலுக்கு ஆளானார். இந்தத் தீவிர சோகமும் அழுத்தமும் அவரது உடல்நலனை மிக மோசமாகப் பாதித்தன. ஏற்கனவே இருந்த வயது முதிர்வு மற்றும் நுரையீரல் சார்ந்த சுவாசப் பிரச்சினைகள் தீவிரமடைந்தன. மகனை இழந்த துயரத்திலிருந்து மீள முடியாமலும், தொடர் உடல்நலக் குறைபாட்டினாலும் அவதிப்பட்டு வந்த ‘இயக்குனர் இமயம்’ பாரதிராஜா, 2026 ஜூன் 10 அன்று தனது 84-வது வயதில் சென்னையில் காலமானார்.

அவர் மறைந்தாலும், அவர் தமிழ் திரையுலகில் விதைத்துச் சென்ற யதார்த்த சினிமா என்னும் விதை, இன்னும் பல தலைமுறை இயக்குனர்களுக்கு ஒரு பாடப்புத்தகமாக விளங்கும் என்பதில் ஐயமில்லை. கிராமத்து மண் வாசனையோடு கலந்திருக்கும் அவரது நினைவுகளுக்குப் பனிப்பூக்களின் அஞ்சலி!

• சரவணகுமரன்