விரல் வழி திரை போதை

ஒரு காலத்தில் புகைப்படங்களை மட்டும் பகிர்ந்துகொள்ளப் பயன்பட்ட ஒரு சமூக ஊடகச் செயலி, இன்று மனிதகுலத்தின் பெரும்பாலான நேரத்தையும், ஏன்… ஒரு நாட்டின் அரசியல் தலைவிதியையும்கூடத் தீர்மானிக்கும் சக்தியாக உருவெடுத்துள்ளது என்றால் அது மிகையல்ல. அந்தச் சக்திக்கு வைக்கப்பட்டுள்ள பெயர்தான் ‘இன்ஸ்டாகிராம் ரீல்ஸ்’. விரல் நுனியில் உலகம் சுழலும் இந்த டிஜிட்டல் யுகத்தில், ரீல்ஸ் எவ்வாறு தோன்றியது, அது நம் மூளையை எவ்வாறு கட்டுப்படுத்துகிறது, வியாபார உலகத்தையும் சமீபத்திய தமிழ்நாட்டு அரசியல் களத்தையும் எவ்வாறு மாற்றியமைத்துள்ளது என்பதை விரிவாகப் பார்ப்போம்.

2010-ஆம் ஆண்டு அக்டோபர் 6 அன்று கெவின் சிஸ்ட்ரோம் மற்றும் மைக் க்ரைகர் ஆகியோரால் இன்ஸ்டாகிராம் தொடங்கப்பட்டது. ஆரம்பத்தில், பயனர்கள் தாங்கள் எடுக்கும் புகைப்படங்களுக்கு விதவிதமான ‘ஃபில்டர்களை’ வழங்கி, அழகுபடுத்திப் பகிர்வதற்கான தளமாகவே இது இருந்தது. 2012-இல் மார்க் ஜூக்கர்பெர்க்கின் ஃபேஸ்புக் (தற்போது Meta) நிறுவனம், இதனை $1 பில்லியன் அமெரிக்க டாலருக்குக் கைப்பற்றிய பிறகு, இதன் வளர்ச்சி பலமடங்கு வேகமெடுத்தது.

குறுகிய கால வீடியோக்களின் (Short-form videos) உலகளாவிய சந்தையை டிக்டாக் (TikTok) ஆக்கிரமித்திருந்த வேளையில், உலக நாடுகளின் அரசியல் நகர்வுகள் இன்ஸ்டாகிராமிற்கு மாபெரும் வரப்பிரசாதமாக அமைந்தன. 2020 ஜூன் மாதம் எல்லை அரசியல் மற்றும் தகவல் பாதுகாப்பு காரணங்களுக்காக இந்திய அரசு டிக்டாக்கை முற்றிலுமாகத் தடை செய்தது. இது இந்தியாவில் டிக்டாக் விட்டுச்சென்ற பல கோடி பயனர்களைக் கொண்ட மிகப்பெரிய சந்தை இடைவெளியை உருவாக்கியது. இந்த வாய்ப்பை மிகச்சரியாகப் பயன்படுத்திய இன்ஸ்டாகிராம், ஜூலை 2020-இல் தனது ‘Reels’ வசதியை முதன்முதலில் இந்தியாவில் அறிமுகப்படுத்தி, குறுகிய வீடியோ சந்தையைக் கைப்பற்றியது.

அதேபோல், அமெரிக்க அரசும் டிக்டாக் நிறுவனத்தின் தாய் நிறுவனமான ‘பைட் டான்ஸ்’ (ByteDance) மீது சீன அரசாங்கத்தின் தரவு மேலாண்மை அச்சம் காரணமாகக் கடுமையான கட்டுப்பாடுகளையும், அதன் அமெரிக்கப் பங்குகளை விற்கக் கோரும் சட்டங்களையும் கொண்டு வந்தது. பல ஆண்டுகள் நீடித்த சட்டப் போராட்டங்கள், பயன்பாட்டுத் தடைகள் மற்றும் நிச்சயமற்ற தன்மையால் அமெரிக்காவிலும் டிக்டாக் பெரும் பின்னடைவைச் சந்தித்தது. அமெரிக்க மற்றும் இந்திய அரசுகளின் இந்த நடவடிக்கைகள் நேரடியாக இன்ஸ்டாகிராமிற்கு ஆதரவாக எடுக்கப்படவில்லை என்றாலும், உலகின் இரு பெரிய சந்தைகளில் டிக்டாக்கிற்கு ஏற்பட்ட முடக்கம், ‘மெட்டா’ நிறுவனத்தின் இன்ஸ்டாகிராம் ரீல்ஸ் உலகளாவிய சிம்மாசனத்தில் அமர மறைமுகமாகப் பெருமளவில் உதவியது.

ரீல்ஸ் இவ்வளவு பெரிய வெற்றியைப் பெற்றதற்குப் பின்னால் பல முக்கியக் காரணங்கள் உள்ளன. நீங்கள் எந்த வகையான வீடியோக்களை அதிகம் பார்க்கிறீர்களோ, அதே போன்ற வீடியோக்களைத் தேடித் தேடி உங்கள் மொபைல் திரையில் கொண்டு வந்து நிறுத்தும் ‘ஸ்மார்ட் அல்காரிதம்’ (Smart Algorithm), இதற்கு முக்கியப் பங்கு வகிக்கிறது. மேலும் எடிட்டிங் பற்றிய எந்தப் பெரிய தொழில்நுட்ப அறிவும் இன்றி, 15 முதல் 60 வினாடிகளுக்குள் எளிமையாக வீடியோக்களை உருவாக்கும் சூழலும் அமைந்தது. பின்தொடர்பவர்கள் (Followers) குறைவாக இருந்தாலும், நல்ல உள்ளடக்கம் இருந்தால் மில்லியன் கணக்கிலான மக்களைச் சென்றடையும் சமவாய்ப்பை இது அனைவருக்கும் வழங்கியது.

ரீல்ஸ் பக்கத்திற்குள் சென்றால் மணிக்கணக்கில் நேரம் போவதே தெரியாமல் போவதற்குப் பின்னால் ஒரு பெரிய அறிவியல் காரணியும் உள்ளது. ஒவ்வொரு முறை நீங்கள் விரலால் ரீல்ஸை மேல்நோக்கிச் ‘ஸ்வைப்’ செய்யும்போதும், “அடுத்த வீடியோவில் என்ன சுவாரசியம் காத்திருக்கிறதோ?” என்ற எதிர்பார்ப்பில் மூளையில் ‘டோபமைன்’ (Dopamine) என்னும் மகிழ்ச்சி ஹார்மோன் சுரக்கிறது. இது ஒரு கட்டத்தில் போதையாகவே மாறிவிடுகிறது. சில வினாடிகளிலேயே பொழுதுபோக்கு கிடைத்துவிடுவதால், பெரிய புத்தகங்களையோ அல்லது நீண்ட செய்திகளையோ பொறுமையாகப் படிக்கும்/பார்க்கும் பழக்கம் மக்களிடம் பெருமளவு குறைந்துவிட்டது.

இன்றைய நவீன வாழ்க்கையில் பேருந்துக்காகக் காத்திருக்கும் சில நிமிடங்கள், கடைகளில் வரிசையில் நிற்கும் நேரம் அல்லது வேலைக்கு நடுவே கிடைக்கும் சிறிய இடைவெளிகளில் எல்லாம் மனித மூளை இயல்பாகவே ‘மைக்ரோ-மோமண்ட் ஸ்க்ரோலிங்’ (Micro-moment scrolling) என்ற நிலைக்குச் சென்றுவிடுகிறது. எந்தவிதமான யோசனையும் இன்றி உடனடியாகக் கிடைக்கும் பொழுதுபோக்காக ரீல்ஸ் இருப்பதால், மக்கள் தங்களின் ஓய்வு நேரத்தையும் காத்திருக்கும் நொடிகளையும் ரீல்ஸ் பார்த்தே செலவிடுகிறார்கள். ரீல்ஸ் பக்கத்திற்கு ‘கடைசிப் பக்கம்’ என்று ஒன்றே இல்லாததால், ஒரு நிமிடக் காத்திருப்புக்கூட அரை மணி நேர ஸ்க்ரோலிங்காக மாறிவிடுகிறது.

வெறும் பொழுதுபோக்காக மட்டும் இருந்த ரீல்ஸ், இன்று பிரம்மாண்ட வர்த்தக மேடையாக உருவெடுத்துள்ளது. பெரிய நிறுவனங்கள் முதல் சிறுகுறு வணிகர்கள் வரை அனைவருமே ரீல்ஸை முதன்மைச் சந்தைப்படுத்தல் (Marketing) தளமாகப் பயன்படுத்துகிறார்கள். பிரபல இன்ஃப்ளூயன்ஸர்கள் (Influencers) தாங்கள் பதிவிடும் ஒரு ரீல்ஸுக்கு பல ஆயிரங்கள் முதல் லட்சங்கள் வரை கட்டணமாகப் பெறுகின்றனர்.

குறிப்பாக, தமிழ்நாட்டில் பாரம்பரிய பட்டுப் புடவைகள், காட்டன் புடவைகள் மற்றும் ஆடை ரகங்களை ரீல்ஸ்கள் மூலம் நேரடியாகக் காட்சிப்படுத்தி விற்கும் முறை விஸ்வரூபம் எடுத்துள்ளது. ரீல்ஸைப் பார்க்கும் வாடிக்கையாளர், அந்த ஆடை பிடித்திருந்தால் வீடியோவில் இருக்கும் இணைப்பு மூலம் உடனடியாக ‘வாட்ஸ்அப்’ (WhatsApp) வழியாகக் கடை உரிமையாளரைத் தொடர்புகொள்கிறார். புடவையின் தரம் மற்றும் கூடுதல் படங்களை வாட்ஸ்அப்பில் உறுதிசெய்த பிறகு, ‘ஜிபே’ (Google Pay) அல்லது பிற யுபிஐ (UPI) செயலிகள் மூலம் உடனடியாகப் பணப்பரிவர்த்தனை செய்து, கூரியர் மூலமாக ஆடையைப் பெற்றுக்கொள்கிறார். பெரிய இணையதளங்களோ (Websites) அல்லது இயங்குதளங்களோ (Platforms) இன்றி, ‘ரீல்ஸ் ➔ வாட்ஸ்அப் ➔ ஜிபே’ என்ற இந்த எளிமையான மூன்று படிநிலை வியாபாரம், சிறு தொழில் முனைவோரின் விற்பனையைப் பலமடங்கு உயர்த்தியுள்ளது.

சமீபத்திய தமிழ்நாட்டு அரசியல் களம் வரை ரீல்ஸின் தாக்கம் ஒரு புதிய டிஜிட்டல் திருப்பத்தையே ஏற்படுத்தியுள்ளது. குறிப்பாக, நடிகர் விஜய்யின் ‘தமிழக வெற்றி கழகம்’ (TVK) முதன்முறையாகத் தேர்தலில் களம் இறங்கித் தீவிரமான அரசியல் நகர்வுகளை மேற்கொண்டு வருவதிலும், இளைஞர்களைச் சென்றடைவதிலும் இன்ஸ்டாகிராமிற்கு மிக முக்கியப் பங்கு உண்டு. பாரம்பரியமான கட்சிகளின் பல தசாப்த கால ஆதிக்கத்திற்கு மத்தியில், முதல்முறை வாக்காளர்களான இளைஞர்களைத் தினமும் அவர்களின் மொபைல் திரையிலேயே சந்தித்து, அவர்களின் ஓய்வு நேரங்களிலும் ரீல்ஸ்கள் மூலம் பிரசாரத்தைக் கொண்டு சேர்க்கும் உத்தியை TVK கையாண்டு வருகிறது.

TVK கட்சியின் தலைவர்களும் அதன் ஐடி விங் (IT Wing) நிர்வாகிகளும் இன்ஸ்டாகிராம் ரீல்ஸை இருமுனை ஆயுதமாகப் பயன்படுத்துகின்றனர். ஒருபுறம் விஜய் அவர்களின் மாஸ் தோற்றங்கள், திரைப்படப் பாணி வசனங்கள் மற்றும் மக்கள் சந்திப்புகளை 30 வினாடி வீடியோக்களாக மாற்றி, தங்களின் செல்வாக்கை உச்சத்திற்குக் கொண்டு செல்கின்றனர். மறுபுறம், மாற்றுக் கட்சித் தலைவர்களின் மேடைப் பேச்சுகள் மற்றும் நிர்வாகச் சறுக்கல்களைத் துல்லியமாகச் சேகரித்து, அவற்றை நகைச்சுவையான மீம் ரீல்ஸ்களாகவும் விமர்சன வீடியோக்களாகவும் மாற்றித் திரையை ஆக்கிரமிக்கின்றனர். எதிர்த்தரப்புத் தலைவர்களின் பிம்பத்தைச் சிதைக்கவும், அவர்களின் தவறுகளை இளைஞர்கள் மத்தியில் அம்பலப்படுத்தவும் இந்த இன்ஸ்டாகிராம் ரீல்ஸ் பிரசாரம் மிகக் கூர்மையான டிஜிட்டல் போராயுதமாகப் பயன்படுகிறது.

தொழில்நுட்பம் என்பது ஒரு கூர்மையான கத்தி போன்றது. அதைக் கொண்டு தொழிலை வளர்க்கவும், கலைகளையும் திறமைகளையும் உலகிற்கு வெளிப்படுத்தவும் முடியும்; தேர்தல் களத்தில் பெரிய மாற்றங்களையும்கூடச் சாத்தியப்படுத்த முடியும். அதே நேரத்தில், அது நம் ஓய்வு நேரத்தையும், பணப்பரிவர்த்தனைகளையும், சிந்தனைத் திறனையும், அரசியல் முடிவுகளையும்கூட மறைமுகமாகக் கட்டுப்படுத்தும் அளவுக்குச் சக்தி வாய்ந்தது என்பதை உணர்வது அவசியம். ரீல்ஸை நாம் ரசிப்பதோடு நிறுத்திக்கொள்கிறோமா அல்லது ரீல்ஸ் நம்மை ரசிக்க வைத்து இயக்குகிறதா என்பதைச் சிந்திக்க வேண்டிய தருணம் இது!

– சரவணகுமரன்